Sa Silangang bahagi ng Metro Manila, doon mo makikita ang bayang kakaiba. Inaagusan ito ng mahabang ilog na nakadugtong sa sikat na Ilog Pasig at mula sa kabundukan ng Sierra Madre. Kilala rin ang bayang ito sa paggawa ng sapatos na matitibay at pasok sa bulsa. Malaking parte ng probinsya ng Rizal ang pumapalibot rito. Tinagurian din itong "Little Singapore" ng Pilipinas dahil sa angking kalinisan taglay. Ito ang Marikina, ang lungsod ng may mabuting ugali, disiplina at kahusayan.
Ito ang ginamit na konsepto sa pagbuo ng UP Kustura, isang organisasyong panglungsod at panglipunan ng mga mag-aaral sa Unibersidad ng Pilipinas-Diliman. Lahat ng kasapi rito ay pawang mga taga-Marikina. Pinagbubuklod sila ng isang lahi, isang wika, isang diwa, isang kultura at isang magagandang hangarin: ang makapaglingkod sa sintang pinagmulan.
Hindi naman biglaan ang pagsulpot ng katipunang ito. Mangyari pa, ang ideya sa pagbuo ng UP Kustura ay nagsimula sa pagnanais na makabuo ng isang organisasyong binubuo ng mga estudyante sa Unibersidad ng Pilipinas na naninirahan sa NCR o matatawag din nating Metro Manileño.
Ang ideyang ito ay hindi huminto sa pagiging isang plano lamang. Nagsimula ang pagsasabuhay ng nabuong ideya noong mga buwan ng taong 2001. May maliit na grupo ng mag-aaral galing sa iba't ibang kolehiyo ng Diliman ang kumilos upang makabuo ng isang pangprobinsyal/pangrehiyonal na organisasyon na kumakatawan sa NCR. Ngunit sa kadahilanang ang mga kasapi ng grupong ito ay pawang mga taga-Marikina at napag-isip-isip nilang nangangailangan ng mas maraming oras at trabaho upang mabuklod ang mga Metro Manileño na nasa pamantasan, napagdesisyonan nilang gawin na lamang itong organisayong panglungsod imbis na palawakin ang sakop at gawing rehiyonal.
Binigyan sila ng OSA (Office of Student Affairs) ng tatlong buwang palugit, mula Marso hanggang Hunyo, upang mangalap ng higit sa labing limang miyembrong tagapagtatag. Nakaatas na rin sa mga miyembrong umanib ang pagbabalangkas ng konstitusyon.
Dahil sa mga salik na kanilang binigyang importansya at sa pagkumpleto sa mga kinakailangan, ipinanganak ang UP Kustura, ang samahan ng mga mag-aaral ng UP na naninirahan sa Marikina. Ito ang kauna-unahan at kaisa-isang organisasyon sa UP na nakabase sa lungsod na kinasasakupan ng Metro Manila.
Pormal nang pinasinayanan ang konstitusyon ng samahan nasusulat sa wikang Filipino noong ika-pito ng Hulyo ng nasabing taon sa Riverbanks Center, Marikina. Ito ay sinertipika ng humigit kumulang sa dalawampu't limang mag-aaral sa iba't-ibang kolehiyo ng pamantasan. Ito na rin ang nagsilbing opisyal na petsa ng pagtatag. Opisyal nang ipinakilala sa madla ang samahang ito na may opisyal nang pangalang, UP Kustura, salitang lokal para sa tahi at kumakatawan sa pinag-isang diwa at layunin ng mga kasapi.
Tatlong buwan pagkatapos ng pagkatatag, inilunsad ng samahan ang kanilang unang proyekto na kinilalang LISTO: Tagisan ng Talino ng mga Marikeño, isang paligsahang susukat sa talino't kapasidad ng mga mag-aaral sa matataas na paaralan. Ito ay ginanap sa eskwelahan ng Roosevelt College sa Marikina na nilahukan ng limang paaralan.
Nagtuloy-tuloy pa ang pamamayagpag ng UP Kustura at ang unang proyekto'y nasundan pa ng marami. Ilan lamang ang LISTO: Tagisan ng Talino, Linis Kalikasan, at Tutorial Lessons sa mga proyektong sinusulong ng Kustura upang mahasa ang galing, mapabuti at matulungan ang mga taga-Marikina hindi lamang sa aspektong pan-edukasyon gayundin sa aspektong pangkalikasan at pampayanan.
Sa ikasampu nitong pamamayagpag dala ang pangalan ng abang unibersidad at ng sintang lungsod, asahan natin ang mas marami pang proyekto, mas maraming programa at mas masayang pamilyang mararanasan mo lamang sa UP Kustura.
0 comments:
Post a Comment
I would love to hear from you...